Меню

Блаженная евдокия чудиновская молитвы

Блаженная евдокия чудиновская молитвы

Тропарь, гласъ 1
Благую часть послушанiя Христу Богу избравши, и Того стопамъ отъ юности путемъ крестнымъ последовавши, козни вражiя молитвою и постомъ сокрушила eси, и Духа Святаго дарами украсилася eси, блаженная Евдокiе: молися стране нашей даровати миръ, и сыновомъ Российскимъ спастися.

Кондакъ, гласъ 3
Ловленiя мирскаго избегшую, целомудрiя красотою и терпенiя венцемъ украшенную, богомудрую Евдокiю блаженную, людiе восхвалимъ: та бо съ лики святыхъ всехъ Спасу предстоитъ, просящи даровати умиренiе миру, и душамъ нашимъ велiю милость.

Икосъ
Гласъ Христовъ, во святемъ Евангелiи реченный, блаженная Евдокiе, услышала eси, глаголющий: иже погубитъ душу свою Мене ради, той спасетъ ю. Сего ради на всякъ день скорби, беды и болезни безъ роптанiя претерпевая, обрела eси душу твою смиренiемъ, аки бисеры многоценными украшенную. Темже и приходящимъ къ тебе утешенiемъ была eси, къ пользе душевней назиданiя съ кротостiю подавая. О насъ, къ тебе взывающихъ, Господу помолися, просящи даровати умиренiе миру, и душамъ нашимъ велiю милость.

Акафистъ блаженной Евдокiи Чудиновской

Кондак 1
Избранной угоднице Христа Бога нашего блаженной Евдокiи составимъ похвалу, зряше ю аки звезду новую на тверди Церковней возсiявшую, и насъ заблуждшихъ и тёмныхъ къ Солнцу Правды отъ Девы явившемуся приводящую. Сiю днесь вернии сошедшеся, воспети потщимся, предъ честнымъ eя образомъ со умиленiемъ и радостiю зовуще:
Радуйся, блаженная мати Евдокiе, за ны грешныя ко Спасу всехъ молитвеннице усердная.

Икосъ 1
Ангеломъ светлымъ, хранителемъ твоимъ, отъ смерти наглыя сохранена была eси, Евдокiе, eгда младенцу ти eще сущу, звери дивiи раны ти причиняху, и паче онехъ лютейшiе разбойницы обиды ти деяху, отъ близкихъ твоихъ разлучая, и съ собою въ чаще безлюдней удержавая. Ты же, блаженная, на eдинаго Господа надежду имея, лютости сихъ избегла eси. Сицевое убо твое въ напастехъ онехъ терпенiе прославляюще, вси взываемъ:
Радуйся, отъ младенчества твоего скорби многи и болезни понесшая;
Радуйся, яко терпенiемъ сихъ добръ навыкъ крестоношенiя приобретшая;
Радуйся, путемъ кротости ходившая и темъ земли живыхъ блаженно достигшая;
Радуйся, Христа Iисуса Сладчайшаго надеждою и крепостiю своею всегда имевшая;
Радуйся, яко до кончины житiя твоего за Подвигоположникомъ Христомъ неуклонно следовала eси;
Радуйся, яко многий и добрый плодъ въ терпенiи Небесному Жениху принесши, съ мудрыми девами въ чертогъ веселiя нескончаемого вошла eси;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондак 2
Видя Господь души твоея доброту, Евдокiе блаженная, сосудъ избранъ отъ юности тя приуготовляше, eгда скорбми и напастьми многими испытуема была eси, да аки злато въ горниле вмале искушена бывши, большiя чести сподобишися, въ невечернемъ дни вечнемъ воспевая: Аллилуйя.

Икос 2
Разумъ светомъ заповедей Христовыхъ просвещенъ имела eси, Евдокiе незлобивая, eгда злодеевъ оных простила eси, и якоже Христосъ за распинателей, тако и ты за обидящихъ тя молилася eси. Сего ради и мы, таковой любви твоей ко врагамъ дивяшеся, вопiемъ ти:
Радуйся, яко злоба мира сего суетнаго очей сердца твоего помрачити не возможе;
Радуйся, яко любве христовы красота душу твою просветила eсть;
Радуйся, горькую чашу сиротства испившая;
Радуйся, роптанiемъ или досадою никогда же Бога прогневавшая;
Радуйся, яко отъ инородцевъ связана сущи, по каменiемъ влекома была eси;
Радуйся, яко терзанiе то претерпевши, не озлобилася eси, но паче о прощенiи обидевшихъ тя ходатайствовала eси;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондакъ 3
Силою свыше укрепляема, труды тяжкiе за послушанiе домашнимъ твоимъ понесла eси, сего ради отъ Христа Владыки, труждающихся къ Себе призывающего, утешаема была eсть, eгда изъ глубины сердечныя взывала eси eму: Аллилуйя.

Икосъ 3
Имея во устехъ и сердце твоемъ молитву теплую къ Богоматери, скоро услышана Ею была eси, Евдокiе, eгда на поле льняномъ труждаяся и зело изнемогши, виденiе жены светлыя и кроткiя тебе явися, яже труждащеся съ тобою и словесы тихими и любезными тебе утешаше. Отъ насъ же, въ нераденiи сущихъ, прiими малыя сiя похвалы:
Радуйся, въ трудехъ неленостныхъ житiе проводившая;
Радуйся, съ труды телесными теплую молитву сердечную добре сочетавшая;
Радуйся, небеснымъ явленiемъ зело обрадованная;
Радуйся, яко ныне и сама ты изнемогающимъ въ трудехъ непосильныхъ помошницею являешися;
Радуйся, яко труды своими непрестанными повеленiе апостола: аще кто не труждается, да не яст, ленивымъ намъ напоминаеши;
Радуйся, яко въ лютыхъ обстоянiяхъ умъ свой къ Богу въ молитве возвышати насъ научаюши;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондакъ 4
Бюрю клеветы и злословiя воздвиже на тя лукавый супостатъ, eгда чрезъ языки льстивыя доносъ ложный на тя учини, аки блудницу тя представляя, и чрезъ то поношенiе и водою студенною истязанiе устрои. Ты же, Евдокiе смиренная, въ невинномъ страданiи твоемъ, Богу, тайная сердецъ ведущему, воспевала eси: Аллилуйя.

Икосъ 4
Слышаша людiе мнози безвинное истязанiе твое, Евдокiе, eгда на мразе лютомъ водою обливаема была eси, тогда зрящiи тя умилишася сердцемъ и на неправедный судъ негодоваша. Жена же некая, злобою неправедною на тя неистовствовавшая, виновною тя представляя, дщерию своею всуе зле клялася eси, и абiе судъ Божий постиже ю: дщерь бо eя внезапу умре. Жена же, чрез то неправду и неразумiе свое познавши, со слезами многими и прощенiи тя моляше. Мы же, сiе испытанiе твое воспоминающе, взываемъ:
Радуйся, яко целомудренна сущи и никоегоже зла сотворши, хулы и руганiе безвинно претерпела eси;
Радуйся, яко Христу без вины поруганному уподобитися сподобилася eси;
Радуйся, яко мразомъ и водою студеною истязуема бывши, Бога eдинаго и Матерь Его Пречистую на помощь призывала eси;
Радуйся, яко ни eдинымъ словомъ мучителей своихъ укорила eси;
Радуйся, яко изведе Господь правду твою, яки светъ;
Радуйся, яко терпенiемъ и незлобiемъ твоимъ духъ злобы и служители eго посрамишася;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Читайте также:  Kakaya est molitva v den operatsii

Кондакъ 5
Боготечней звезде новосiяющей уподобися путь многотруднаго житiя твоего, Евдокiе блаженная, являя намъ како среди тьмы злобы и коварства светъ Евангелiя Христова сердце человече просвещаетъ. Ты бо воистину прежде всего Царствiя Божiя и правды Его взыскала eси, и на земли сущи, небесную песнь Богу воспевала eси: Аллилуйя.

Икосъ 5
Видя долготерпеливый Господь угодное житiе твое, Евдокiе, благоволи чрезъ тебе явити миру загробныя жизни бытiе несумненное. Три дни бо умершей ти сущей и на погребенiе несомой, во храме внезапу ожила eси, людемъ же, Бога прославившимъ, виденiя бывшая ти многiя поведала eси. Молимъ тя ныне усердно: во страшный оный часъ испытанiя по смерти нашей, заступница буди намъ, вопиющимъ ти:
Радуйся, вратами смерти промысломъ Божiимъ не удержанная;
Радуйся, ко вразумлению живущимъ во гресехъ, о ожидающихъ тамо мытарствахъ всемъ возвещати повеленiя получившая;
Радуйся, красоту селений райскихъ зрети сподобившаяся;
Радуйся, яко ветвь чудную благоухающую во уверенiе бывшихъ тебе откровений въ руце прiяла eси;
Радуйся, яко ангеломъ святымъ хранима, началъ и властей злобы поднебесныхъ невредимо избегла eси;
Радуйся, яко беседующимъ съ тобой о мукахъ грешниковъ и блаженстве праведниковъ къ пользе душевней яко очевидица сущи повествовала eси;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондакъ 6
Проповедницей жизни нескончаемой, отъ Господа любящимъ Его уготованной, явилася eси, Евдокiе достохвальная: яко чрезъ бывшая ти откровенiя, яже во дни обмиранiя твоего получила eси, наставляла eси всехъ приходящихъ къ тебе отъ злобы и греховъ сохранятися, ко Господу любовь и молитву усердную имети, и милостыню обильно творити. Людiе же мнози, тобою вразумляеми, научахуся пети eдиному Подателю жизни и воскресенiя Богу песнь: Аллилуйя.

Икосъ 6
Возсiя среди ночи безбожiя во стране нашей светлое житiе твое, Евдокiе Богомъ умудренная, подобяся бо древнимъ подвижникомъ, подвигъ молчанiя на себе подъемши, темъ душу свою къ Богу eдиному устремляти добре возжелала eси. Темже не токмо словеса, но и молчанiе твое зрящимъ тя душевную пользу подаваше, мы же о семъ дивящеся, взываемъ ти:
Радуйся, яко проповедию о Христе Спасителе нашемъ апостоламъ уподобилася eси;
Радуйся, яко среди тьмы богоборчества аки светильникъ духовный показалася eси;
Радуйся, яко не отъ суетныя человеческiе мудрости, но отъ словесъ Евангельскихъ приходящихъ къ тебе назидала eси;
Радуйся, яко въ подвизе молчанiя потрудившеся, многъ плодъ духовный стяжала eси;
Радуйся, блага мира сего аки тленная и суетная презревшая;
Радуйся, славы скоропреходящiя отъ человекъ не искавшая;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондaкъ 7
Хотяй всемъ человекомъ спастися и въ познанiе истины прiити, Христосъ, истинный Богъ нашъ, усмотри промышленiемъ Своимъ коемуждо путь спасенiя удобовосходный. Ты убо, блаженная Евдокiе, гласъ Его, тя призывающий, душевными ушесы услышала eси, и Тому eдиному всею душею прилепилася eси. Сего ради со всеми святыми поеши ныне во обителехъ небесныхъ песнь победную: Аллилуйя.

Икосъ 7
Новую благодать показа всехъ Творец и Владыка на тебе, Евдокiе богоугодная: свидетельствоваху бо людiе мнози, къ тебе приходящiи, яко не бе въ тебе жестокости гневливыя, ниже учительства надменного, плодами бо Духа Святого украшена была eси, отъ них же суть: любы, радость, миръ, долготерпенiе, благость, милосердiе, вера, кротость, воздержанiе, плоть же свою со страстьми и похотьми терпенiемъ скорбей и болезней безъ роптанiя распинала eси. Сего ради ныне прiими отъ насъ похвалы сiя:
Радуйся, вжиганiемъ лампадъ и свещей предъ честными образами Христа, Богородицы и святыхъ угодниковъ добре техъ почитавшая;
Радуйся, душу свою аки лампаду нерукотворную предъ светлосiяннымъ ликомъ Хрисовымъ неугасимо возжегшая;
Радуйся, житiе вне святости и веры православные, адомъ кромешнымъ и усыпленiемъ греховнымъ именовавшая;
Радуйся, за сiе ко святыне Божiей благоговенiе и любовь, освященiя и просвещенiя отъ Него сподобившаяся;
Радуйся, въ мире многогрешномъ и многоскорбномъ тихости и благости небесной кротко сiявшая;
Радуйся, яко въ шествiи путемъ узкимъ спасительнымъ многимъ людемъ православнымъ помошницею явилася eси;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Читайте также:  Дом молитвы в чите

Кондакъ 8
Странники и пришельцы eсмы на земли, по глаголу апостола: не имамы зде пребывающего града, но грядущего Небесного Iерусалима взыскуемъ, идеже отретъ Хрисосъ Богъ всякую слезу отъ очей избранныхъ Своихъ. Зде же убо на земли намъ сущимъ различны дарованiя коемуждо противу силы eго, Небесный Домувладыка подаде рабомъ Своимъ, да прославляемъ eго выну въ душахъ и телесехъ нашихъ. Тако и ты, блаженная Евдокiе, таланта своего въ земли нераденiя и лености не сокрыла eси, но въ терпенiи мноземъ, смиренiи нелицемернемъ и любви теплейшей, сторицею души твоея красоту умножила eси, поя eдиному спасенiя нашего Виновнику достойную песнь: Aллилуйя.

Икосъ 8
Всею душею, всею крепостию и всемъ помышленiемъ твоимъ Бога Всевышняго по заповеди Его возлюбивши, и сама отъ Него возлюблена была eси, Евдокiе богоизбранная: Той бо, зря многоскорбное и терпеливное въ дольнемъ мире семъ житiе, горними виденiи тя утешаше. Видеша бо иногда живущiи съ тобою въ келiи твоей въ нощи аки светъ небесный сiяющий, слышаху же и гласи молитвеннiи, службу Господню чтущiи и поющiи. Тя убо, блаженная мати, ныне не яко въ зерцале, но лицемъ къ лицу славу Господню зрящую восхваляюще, вопiемъ сице:
Радуйся, суетному стяжательству благъ и удовольствий земныхъ не прилепившаяся;
Радуйся, къ молитвенному славословию Творца всяческихъ отъ юности себе добре приобучившая;
Радуйся, воинствамъ небесныхъ силъ въ семъ усердно поревновавшая;
Радуйся, eже на земли съ неземными лики Спасителя своего Христа Бога прославлявшая;
Радуйся, Евангелiе святое и все Писанiе Божественное зело возлюбившая, и въ житiи твоемъ, eлико мощно ти бе, воплотившая;
Радуйся, о временах тяжкихъ, греховъ ради нашихъ на землю нашу грядущихъ, предвозвестившая;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондак 9
Всяческiя радости и благодаренiя исполняхуся людiе, помощь многоразлiяную молитвами твоими прiемлющiи, ибо прозренiя даръ обиленъ въ тебе явися: сего ради нецiи обличаемiи тобою отъ греховныя жизни отвращахуся, друзiи же въ недоуменныхъ обстоянiяхъ суще добръ советъ и наставленiя отъ тебе прiимаху, вси же купно вопiяху Богу, дивному во святыхъ Своихъ, хвалебную песнь: Aллилуйя.

Икос 9
Витийствуютъ мнози о многообразныхъ явныхъ, паче же и сокровенныхъ реченiяхъ твоихъ, яже Премудростiю Божiею просвещаема, ко людемъ вещала eси, Евдокiе. Не о своей си корысти, но о спасенiи душъ человеческихъ попеченiе твое бысть, eгда приходящимъ къ тебе возвещала eси, како во благо пути житiя твоего исправляти подобаетъ. Сего ради и мы, о пути спасенiя недоумеющiи и сомненiи многими колеблемiи, вразумленiя отъ тебе ищуще, взываемъ:
Радуйся, Евдокiе блаженная, яко светъ Христовъ душу твою просветилъ есть;
Радуйся, яко Духъ Божий благий на землю праву наставилъ тя есть;
Радуйся, яко на земли живущи, о небесныхъ помышляла eси;
Радуйся, яко во плоти смертней сущи, о жизни духовней и вечней неусыпно пеклася eси;
Радуйся, неправду сокровенную яве обличавшая;
Радуйся, обличаемыхъ тобою души отчаянныя на путь спасительный наставлявшая;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондакъ 10
Спасти хотя душу твою, чистоту девства твоего отъ юности соблюдала eси, угоднице Божiя Евдокiе, ты бо среди соблазновъ мира живущи, аки въ пустыне неблазненна пребывала eси, во внутренней клети сердечней затворяяся и Отцу Небесному вопiя: Aллилуйя.

Икос 10
Стена крепкая обидимымъ eсть молитва праведныя поспешествуема: сице и ты, блаженная Евдокiе, девицамъ некiимъ, за веру Христову отъ злыхъ человекъ утесняемымъ, помощница скорая явилася eси. Ты бо Богу, eдиному прибежищу и защитнику нашему о нихъ крепце моляся, во утешенiе имъ рекла eси: рцыте приставнику вашему, яко въ сосуде eго eлей оскуде зело. И абiе сокровенный глаголъ сей совершися: приставникъ бо оный, обиды девицамъ творивший, вскоре званiя своего лишенъ бысть. Избавленнiи же девицы оныя, въ веселiи Бога своего прославляху, и тя, молитвенницу свою, воспеваху глаголюще:
Радуйся, Евдокiе блаженная, не въ силе констей и не во острiе меча, но въ Бозе eдиномъ упованiе полагавшая;
Радуйся, не своихъ ради обидъ отмщенiя искавшая, но за немощныхъ и беззащитныхъ Бога молившая, и праведный суд Его надъ обидящими яве узревшая;
Радуйся, красоту дома Божiя возлюбившая;
Радуйся, убогое жилище твое непрестанными молитвами и псалмопенiями Небеси уподобившая;
Радуйся, неведомыя судьбы воиновъ, во брани пропавшихъ, скорящимъ сродникомъ ихъ во утешенiе открывавшая;
Радуйся, не о злате или сребре, но о душахъ, аки о сокровище многоценномъ вельми радевшая;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондакъ 11
Пенiе благодарственное воспоимъ ныне благотворителю Христу Iисусу, дивному во святыхъ Своихъ: Той бо угоднице Своей Евдокiи дарова благодать душевные и телесныя недуги врачевати. Тако и Василию некоему, во изступленiи иконы святыя изъ дому своего сожжению предавшему и чрезъ то болезни лютой подпадшему, последи же раскаявшемуся, исцеленiе у Христа Владыки испросила eси, да вразумленъ бывъ, не погибнетъ, но со всеми спасемыми воспоетъ: Aллилуйя.

Читайте также:  Lesopoval molitva s akkordami

Икосъ 11
Светъ Христовъ, всякого человека грядущего въ миръ просвещающий, озари умъ и сердце твое, Евдокiе благохвальная: оледеневшимъ бо въ суете мира сего сердцамъ теплоту словесъ eваангельскихъ являла eси, враждующихъ примиряла eси, во озлобленные души примиренiе влагала eси. Темже тебе, во всякой нужде духовной скорой помощнице нашей, сице глаголемъ:
Радуйся, отъ духовъ злобы стужаемымъ молитвою теплую помощь подававшая;
Радуйся, приходящимъ къ тебе прикровенными словесы душевныя ихъ недуги открывавшая;
Радуйся, яко во обличенiяхъ твоихъ мнози великую пользу душевную обретаху;
Радуйся, грядущiя напасти и беды людемъ открывавшая, да eгда совершатся, волю Божию о семъ разумеютъ и отчаянiя избегнутъ;
Радуйся, святыхъ угодниковъ Божiихъ въ нуждахъ различныхъ призывати насъ научающая;
Радуйся, къ ближнимъ своимъ состраданiе и любовь имети примеромъ своимъ насъ наставляющая;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондак 12
Благодать Божiя явися спасительная всемъ человекомъ, Христа распятаго ведущимъ и воскресенiе Его славящимъ. Несть бо иного имени подъ небесемъ, имже спастися возможемъ, разве сладчайшего имени Iисусова, eмуже ты, блаженная Евдокiе, во вся дни живота своего съ верою взывала eси: Aллилуйя.

Икос 12
Песнь победную ада и смерти победителю взывающе, гласъ Его услышимъ, глаголющий: будь веренъ до смерти, и венецъ жизни нескончаемой дамъ ти. Темже ныне прославимъ угодницу Христову Евдокию блаженную, жизнь свою отъ юности въ руце Его предавшую и до последнего издыханiя своего никакоже отъ Него отступившую. Сего ради вемы, яко пресветлымъ венцемъ венча тя, Евдокiе, Христосъ Господь, и дарова тя молитвенницу и заступницу намъ, въ юдоли земной пребывающимъ. Темже прiими отъ насъ убогихъ сiя похвалы:
Радуйся, веру несумненную даже до конца сохранившая;
Радуйся, надежду на милосердiе Божiе всегда имевшая и въ той никогдаже посрамившаяся;
Радуйся, любовь теплую къ Богу истинному не словомъ токмо, но житiемъ непорочнымъ показавшая;
Радуйся, любовь нелицемерную и расположенiе доброе къ людемъ, по образу Божию созданнымъ, всегда имевшая;
Радуйся, яко не ближнимъ токмо, но и врагомъ своимъ всегда благое творити и желати научаеши насъ;
Радуйся, яко не стяжанiя земная, но Царствiя Божiя и правды Его всегда искати наставляеши насъ;
Радуйся, блаженная мати Евдокiе, за ны грешныя ко Спасу всехъ молитвеннице усердная.

Кондакъ 13
О, честная и блаженная угоднице Христова Евдокiе прехвальная! Прiими отъ насъ многогрешныхъ убогое сiе похваленiе и, предстоя страшному престолу Владыки и Господа нашего Iисуса Христа, пролей теплую твою молитву и о насъ, тьмою злобы и страстей содержимыхъ, и во всякой нужде душевной и житейской буди помощница скорая и милостивая намъ, вопиющимъ Спасителю Богу песнь: Aллилуйя.

Молитва ко святей угоднице Божiей блаженной Евдокiи Чудиновской
О, святая и достохвальная угоднице Божiя Евдокiе, трудами и болезньми многими Богу угодившая, молитвами и добродетельми Имя Его на земли прославившая! Молимъ тя мы ныне, сродницы твои суще: исходатайствуй у Владыки долготерпеливого Всемилостивого Господа нашего Iисуса Христа всемъ вся ко спасению полезная, народамъ отечества нашего миръ и къ познанию Бога истиннаго разумъ светлый, земли Российстей отъ нашествiя супостатъ крепкое защищенiе, правителемъ мудрость и къ народу своему любовь имети, больнымъ исцеленiе, плененнымъ свобожденiе, отъ глада и земли трясенiя сохраненiе, всемъ же намъ другъ ко другу любовь, яко да не именемъ токмо, но и самымъ деломъ христiаны явимся, и въ мире добродетельное поживемъ житiе во всякомъ благочестiи и чистоте.
О, молитвеннице наша теплая, блаженная Евдокiе! Ты на земли живущи никогоже возненавидела eси, но и ко врагомъ своимъ милостива была eси, ныне во Царствiи Отца нашего на небеси водворяяся и неизреченныя любви и благодати Его наслаждаяся, не забуди насъ, убогихъ и немощныхъ, твоея помощи и утешенiя просящихъ! Еще мало и погибнемъ до конца, злымъ обычаемъ аки цепами крепкими оковани суще, и отъ вселукавого врага аки приставника лютого зело стужаеми. Сего ради призри милостивно, и бедами содержимымъ намъ руку помощи простри. На всякий день мысль благу доброе творити влагай въ сердца наши. Научи насъ молитве теплой сердечной, терпению безъ роптанiя и смирению нелицемерному. Паче же даруй намъ любовь истинную христiанскую, да eю руководими, вся заповеди Христовы легце исполняти навыкнемъ, и въ Немъ вси eдино будемъ, и невечернего дня Царствiя Его достигнемъ, въ веселiи души очищенныя прославляя Отца и Сына и Святаго Духа, Единаго въ Троице Святей славимого Бога во веки вековъ.
Аминь.

Величаемъ тя, святая блаженная мати наша Евдокiе, и чтимъ святую память твою, ты бо молиши о насъ Христа Бога нашего.

Источник статьи: http://akafist.narod.ru/E/Evdokia_Chudinovskaya.htm